Uno el va en giro a dir che tuti i vol basàrghe el cul; l’altro el tira for la carega da sota al cul de chi vol sentàrse zo; e la siora la ris-cia de restar col cul per tera. Ah, nen benon.
Se ‘n doss e ‘na val fà en gualif, en Daldoss e ‘n Girardi i fa ‘n rebaltón. Sicome son sempre stà teritoriale e volerìa che i me capissa tuti, scrivo ‘ste monàde en tel me dialet, pensando a ‘sti doi che, per rispèt dei so’ eletori, no i g’à en migol de rispèt a farse demò i “dazi” soi.
Me meraviglio però dela meraviglia de quei che fa analisi e riflesion. Le prime lasséghele al medico e le seconde ai spègi.
Se prové enfati a vardarla per quel che l’èi, ‘sta storia, farè con mi ‘na gran risada vedendo l’ingenuità de quei che fin jeri i se diséva Fradèi e adess i par Orfanèi. Ma, scusàme, no ghèra da nessuna banda qualcheduni en grado de dirghe, a quel che resta dei eredi de Starace, chi che l’è el Daldoss?
Posibol che a nissuni ghe sia vegnù en ment quando, ‘sti ani, el Carleto l’à embotonà el quasi Sindaco Mosconi, su a Vermèi, portandoghe via la carega da soto ‘l cul la stessa sera che l’altro l’èra za drio a sentarse zo? E nissuni se ricorda de quando el Carleto l’à fat la stesa ròba al so’ “amico” Ugo Rossi, che, fidandose, el l’aveva fat asesor tecnico? Alora el Daldoss, per rispèt dei so’ eletori che nol g’aveva, l’à fat su en giom anca del Rossi, per provar a far lu el presidente del “Paese dei Campanelli”. E no ghè sta qualche bon cor che g’avessa dit al sior Urzì, che el se ciama come en becón de af, de quando el Daldoss l’à voltà gabàna anca coi Sindazi, che fin a ‘n minut prima l’era i so’ amizi e con lori el voleva far su el “Polo Teritoriale” o sònte mi cossa?
Ma me domando: te g’ài davanti uno che l’à cambià pù giaghéte, camise, canotiere e mudande de tuti i Magazini Nico messi ensema e adess te resti de giazz se ‘l te ciava? Ma en do vivela ‘sta zent? Per fortuna che i è sempre de men, perché no l’è mai massa tardi per perder el Daldoss e anca ’l Girardi.
Zerto che i è svelti. I “Fradèi” i g’à mess demò ‘n an e mez per pasar da zinque a doi consiglieri. Se i va avanti cossì i ne farà en regal: scomparsi i “Fratelli d’Italia” per Nadal. No restà che nar a pianzer dala Meloni, sperando che no la sia za en viazo per nar a basàrghe el cul a quel altro. Ah, desmentagavo: adess la consistenza politica dela Geròsa l’èi pù mola del lat e dela mòsa.
Saluti dal voss Potachin da Caden
Dopo quel che ho scrit sora, ghe chi che ride, chi che pianze. En amico da la me Val el scrive:
“El manec che sposa la zapa: Daldos padre della “fusione” dei Comuni che ha allontanato cittadini ed elettori dalla voglia di essere protagonisti delle proprie “piccole” comunità corre a “ tegnir su le braghe” a Fugatti , Bisesti e Savoi maldestre zape che ha mandà a remengo le Comunità di Valle col risultato che “el camp el resta grec e biot e coi boi scampadi da la stala per la spuza de sta autonomia senza sugo”.
Te già propri reson, caro amico. L’è che ‘l par che tanti i sia stadi ciapàdi dalla malattia de quel medico todesch. Alzeimer, me par che l’se ciamassa. Eco, i perde la memoria e quan che i va a votar i torna a meterghe sora na cros a certa zent. Sveglia, tangheri, sveglia. (PdC, che vol dir: Potachin da Caden)